depi m maten m leve

nan pòtre w m trase nan je m

tankou m ta di w se […]

ou se manman letènite

—

tèt dyòl ou fèt 

tankou yon karamèl 

m anvi souse 

jiskaske lang lanmè kale n vag

 —

m gade lonbrit ou

tankou yon gwo tourego 

ki arebò twotwa granri 

— m ap priye 

kilè m a tonbe ladan

—

m a resi jwenn refij mwen

tankou lang foumi fou 

ki tonbe nan siwo 

— kann madan yogann

—

m priye silans ou

men m pito tande bri dlo

lè lapli ap tonbe 

— anba lang ou cheri

—

très yo pèdi lizay 

nan je m tankou lorizon 

— k ap depafini  

nan pla men pè letènèl

—

ak douvanjou

bonjou koupe fache

— depitanndat

gad ak ki je solèy gade m

w a konprann poukisa

m pè leve lèmaten lè w pa la

—

di manman m

kouray mwen pèdi fòs

nan rigòl san 

devan sent bènadèt

— adyeridan 

ki sen ankò pou m priye

ki kote fwa sa a pou m jete dlo

— pou w tounen 

—

maten an ankò 

m vin devan w benadèt

solèy la leve li pa di m bonjou

ou ban m pote doulè 

sou kwa rezistans

e depi lò sa se dlo bouch mwen 

— ki nouri m

—

kanmarad si m pa tounen

pran petwo karibe pou pretèks

di manman m pèdi wout lakay

— nan on #hashtag

———————————————

Vag Poetik

Paroles des Îles

Ansky HILAIRE, depuis Leogâne, Haïti, Juin 2025

The post Sent Benadèt — un poème de Ansky HILAIRE appeared first on Mapou Littéraires.

kote w ri

yon ribanbèl papiyon

sèvi m kouwòn 

vil yo anpenpan

tankou solèy lapli makiye

—

zetwal fè lago kache

nan de ranje dan w 

tout lò latè

bliye wout kay òfèv

—

Kè m tounen lanp tètgridap

k ap piyanp piyanp 

nan kalfou zo pwason 

—

zafè sila k pa konnen

si w se premye mèvèy dimonn  

—

mwen m pa bouke make pa

nan kanaval souri w 

lè fanm ki jalou w

fè bri pase cha 

—

tout motè debreyèl mache dwat

tout rivyè se sous

pou flè w pouse 

—

Tonnèboule m an sann

se souri w ki te leve Laza 

———————————————

Vag Poetik

Paroles des Îles

Smeev Jerry, depuis Gonaïves, Haïti, Août 2025

The post Tonnèboule m an sann — un poème de Smeev Jerry appeared first on Mapou Littéraires.

Jodi a fè sèt jou depi lanati mouri

Mo yo monotòn an otòn

Poutan lanmou w koton sou lang mwen

Vid mwen vale Leta sèt fwa diran

Depi jou w kite m lan

Tout ri Pòtoprens sanble

Yon ti kalap fòse pense ak eping ti tèt

Depi jou w ale a

Marengwen anvayi kadav mwen

Rèv mwen depeyize ale avè w

Depi jou w ale a

Mwen kwense la nan kat fasad lavi

Lanmou m chikata

———————————————

Vag Poetik

Paroles des Îles

Wilkens Scott FIFI, depuis les Étas-Unis, Octobre 2025

The post Lanmou monotòn — un poème de Wilkens Scott FIFI appeared first on Mapou Littéraires.

Cheri

ou woule m nan toutouni w

san konnen poukisa gen jou

ki mache bwete

Mwen sispann viv ojoulejou

pou renmen w ak lalin ki leve

san adrès san ansèy

—

Mwen menm poliglòt bèbè

Mwen kontinye nan gras ou

ak tout chante m chante deja

k ap grandi nan pwop sèkèy yo.

—

Si paj blanch pa t bliye non l

ou ta ofri l yon kilòt cheri

pou l konnen chen kole fè lanmou pa do

E mwen avè w pa tann sezon sèch

pou trase liy pataj nou.

—

Cheri

se rivyè m moute ak latranblad

pou adore tete w tankou ti boul dlo lapli.

———————————————

Vag Poetik

Paroles des Îles

Litainé LAGUÈRRE, depuis Port-au-Prince, Août 2025

The post Pari — un poème de Litainé LAGUERRE appeared first on Mapou Littéraires.

Sendika pantalèt anonse grèv

Pou lanse kanpay rebwazman

anba jipon Forèdèpen

Bòt sou kou

Zoklo nan tèt

Traka pou zèb atè

Tanpri pa mande rasin

Pouki gayak ak pichpen pa menm longè

Ni pa vin anmègde fèy

pou deklarasyon kòs bwa te fè

Pa jwe nan nich si w pè foumi

Si w pa gen gan

pa badnen nan tiwèt takèt

Poze kesyon pa pase men

Pase men san poze kesyon

Kite sèpèt nan kwen l

Mete manchèt nan djinn li

Rale wou pou netwaye kwen

Si arebò jwenn

Mitan siman p ap bezwen

Si rak konnen

Raje pa bezwen rakonte

Anba jipon Forèdèpen

Zèb pouse san mezire

Anba jipon Forèdèpen

Dezè plede chare ti marekay

Tè sèk dèyè lakay ap priye pou lapli vini

Labou niche rasin

Swaf sitèn pral resi pase

Bridsoukou sous pete !

Dlo

Dlo

Dlo anvayi toupatou

Lawouze ri gra

Premye fwa nan listwa

Forèdèpen resi mouye kou kana !

———————————————

Vag Poetik

Paroles des Îles

Georgy LUNDY, depuis La France.

The post Dlo nan forè — un poème de Georgy LUNDY appeared first on Mapou Littéraires.

Pòtoprens

tounen rèl san vwa

chak koulwa

se yon lapenn

ki pote mak silans

ki pa janm geri

—

Solèy la

pè gade w nan je

kay kraze —

rèv fann

Nan mache yo

se pri kòlè

grangou ak dezespwa

ki monte

—

Pòtoprens

anba sann

van soufle li

kite yon ti flanm kache

—

Yon pèp ki fè 1804

pa ka mouri nèt.

———————————————

Vag Poetik

Paroles des Îles

Jennifer Eugène, depuis Port-au-Prince, Haïti, 2025

The post Pòtoprens anba sann — un poème de Jennifer EUGÈNE appeared first on Mapou Littéraires.

Cheri

bonnanj ret tou griyen

lè myèl ap priye

sen ou yo

—

se pa premye fwa

m ap viv sa

papiyon lasenjan

k ap kriye pou lodè w

anba je flè yo

———————————————

Vag Poetik

Paroles des Îles

Grégory FORESTAL (Malaba Pitit Plim), depuis Port-au-Prince, Haïti, Octobre 2025

The post Anba je flè yo — un poème de Grégory FORESTAL (Malaba Pitit Plim) appeared first on Mapou Littéraires.

Vil la mitraye ak lanmò

Mwen m ap tann mitrayèt

Lanmou w brake sou mwen

Touye m ak lanmou

Move nouvèl

Souvan fwape pòt inosan

Inegalite pran kui

Pou annuiye tout kwen

Dan jenewozite

Absans ou make m

Plis pase kadav sou tèt

Bwa Vèna

Lè peyi a pran tòde

Ak doulè

Je dou w sifi kòm antidòt

—

Emosyon yo

Deklannche

Bwa sèkèy anba bwa

Elis

—

Lanmou m anime m

Nan chimen w

Ki konkèt ki pi kokèt

Nan moso entensèlman

Souri w

Tout deba

Ki defini naratif la se ou

Mwen m ap kesyone deriv yo

Sèl pye m ki fè street ou swente

—

An n efase tout

Fineray lanmou

Pote nan lespri

Chema konvansyonèl

N ap envante a chita

Kuis a kuis

Fouk nan fouk

Pou jis lavi bouke ak nou

———————————————

Vag Poetik

Paroles des Îles

Donley MÉNARD, depuis Delmas, Haïti, Mars 2025

The post Moso tchanpan nan rapadou — un poème de Donley MÉNARD appeared first on Mapou Littéraires.

Se nan pa pòt ou

mwen trase chemen batistè m

Anba kabann bitasyon ou

mwen aprann kache pou rèv zonbi

ak madigra pa fè m grimas

Konsa dòmi pote m ale nèt ale

Fènwa reveye anba do m

Krik krak anba zetwal tout je kale

—

Menm rat kay pa manke penpennen

nan mitan soukous kadyak mwen

bip bip

Bigay pran po do m pou piyaj

Pinèz souse dènye gout san m

Ay ! Menm yon krich dlo yo pa pote

ale wè de twa gout sewòm sou lang mwen

Adje mwen fin pèd pawòl

Mwen menm bliye moso nan listwa m

—

Men andirans nan memwa m

ape triye fèy apre fèy

tout malveyan ki pa vin pou lapè.

———————————————

Vag Poetik

Paroles des Îles

Sherly Tanis CATOR, depuis Port-de-Paix, Haïti, Mai 2024

The post Lakou lakay — un poème Sherly Tanis CATOR appeared first on Mapou Littéraires.

De gout swè koule

sot tonbe nan fontèn lesyèl

Kè vil Gonayiv bat jous bò dèyè l

Atansyon zanmi

vil sa se vil ki konn gou move rèv

—

Syèl la mare figi l

e fè pipi sou tèt vil la

Kannal Dat ak Rivyè Lakent bwè dlo ra gagann

epi tonbe vomi

vomi tout fristrasyon k te nan vant yo

—

Atansyon zanmi

Gonayiv pa vil ki ka kache lonbrit

lè l ap benyen nan lapli

—

Si w wè m pa nan tete lang

ak mwa Septanm

se pa paske m gen mwa prefere

Si w pa te konnen zanmi

mande ministè anviwonnman

depi 2004

kochma Site Lendepandans lan

gen mwa de nesans

—

Lè lavi ansent katastwòf

Moun Gonayiv konnen byen

nan ki sezon li fè bèl pòte

—

Se poutèt sa

Menm lè ta gen rate prenon

Pyès manman nan Gonayiv

pa p gen foli rele pitit yo Jàn

ni Ana ni Ayk

———————————————

Vag Poetik

Paroles des Îles

Miguel Mingolove ROMAIN, depuis les Gonaïves, Haïti, 2018

The post Rèv mouye — un poème de Miguel Mingolove ROMAIN appeared first on Mapou Littéraires.

Lasibab nan sèvèl kalbas fezè

sèvi janmdebwa

pou pete plafon zèansyen

soulye po lamizè

mak plat pye jodijou bwè

nan lacharite sèt kare chenè

anvan kanaval nan riyèl myèl

lekòl asasen lage bonè

sou lakou jekwazandye an kè

tranglay marasa dyòk absè

anba soutàn kawo blan pasè

—

Dekourajè gwo plòm

dyab

donnen kidnapin lyann rayisab

kon dyondyon sou plonm bab

bèf malad sou sab

antere lespwa nan ze nwa fab

krapo bonga sou do krab

konplotay mafyab

sou dlo sale tafya koupab

tè arab

———————————————

Vag Poetik

Paroles des Îles

Gary S. Daniel (Nèg Gonbolyen), depuis les États-Unis, 2024

The post Dyondyon sou plonm bèf — un poème de Gary S. Daniel (Nèg Gonbolyen) appeared first on Mapou Littéraires.

m anvi dòmi leve nan gildiv ou 

m anvi ou ban m tout koulè ou vle

m anvi sèl renn nan rara ou

—

di mwen si w se Senjak oubyen Senchal

pou m ka chante litani ou

jouk solèy la pèdi chalè l

m anvi ou benyen nan florida m

—

anvan lalin leve gad li

m vle w

m vle w jouk souf mwen sispann 

—

wi

pann mwen

Pann tout tchè fanm mwen

—

pran m jouk lanati fè kòlè 

pran m fè lespri yo fè jalouzi

pran m

jouk mèt latè makònen nou ansanm

—

m anvi

m anvi w

m anvi tout sa k gen anpwent ou

———————————————

Vag Poetik

Paroles des Îles

Edlande Jostha ELIE, depuis L’Éstère, Haïti, 2023

The post Anvi — un poème de Edlande Jostha ELIE appeared first on Mapou Littéraires.

Peyi a lou pase lannuit

dlo zye k ap koule

san k trayi kò pou gangans kanivo

pyeje somèy timoun pase blag lougawou

—

peyi a lou

makòn masak ki mare sou lavi n

tòde kou, kofre rèv

kraze senti lespwa n

—

nou mache tou kwochi

labim pèdi fon nan gade n k ap koule

—

se de bra pandye

n ap fòse pote

yon peyi k ap kapote

yon peyi k lou pase lannuit

———————————————

Vag Poetik

Paroles des Îles

Carl Henry BURIN, depuis Port-au-Prince, Haïti, Novembre 2024

The post BRA KASE — un poème de Carl Henry BURIN appeared first on Mapou Littéraires.

Vil la pete kriye tankou ti moun k ap fè dan

Vil la fonn nan pla men n

Yon bann mòso powèm pandye

Yon bann madjigridji mouye

Tounen kat idantite n

Syans ak teknik menm fin anemi nèt atò

Rèv la blan pase koton

—

Vil la ap jwe marèl de janm louvri

De pye l nan yon sèl sèkèy

Politisyen ap jofre malè n

Palè nasyonal kouche sou yon nat plen pinèz

Pye kout pran devan — rèv la blan pase koton

—

Vil la pran nan piman zwazo

Vil la fouye dwèt nan je l

Alèkile gede danse nan tèt zòt

Si gede pran pouvwa

Peyi a ap tounen yon bèl betiz

Yon trip vide sou papye jounal

Yon labim k ap fòse mache sou talon kikit

Yon wòb koton — yon boul digo nan mitan lanmè

———————————————

Vag Poetik

Paroles des Îles

Ricardo AUGUSTE, depuis les Étas-Unis, Octobre 2025

The post Blan pase koton — un poème de Ricardo AUGUSTE appeared first on Mapou Littéraires.

N ap tange sou klou gagit

je n plen rabouch 

rèl makonnen nan rèl do

lavi se yon chay san toke 

n ap pote jouk nan syèl.

—

Se yon pèlerinay san

nwasè lanmò fè tou wouj

Nanpwen zòt je pete klere

k ap vin ede n meble fenèt

si pa gen lizay lachanm

—

Se sèl sezaryèn revolisyon

ki ka wete lespwa sèkèy madoulè

Sinon tout mò isit gen dwa viv 

anba lalwa leta

———————————————

Vag Poetik

Paroles des Îles

Anderson ILIODAIN (Ekritizè), La République Dominicaine, Mai 2025

The post Litani — un poème de Anderson ILIODAIN (Ekritizè) appeared first on Mapou Littéraires.

Pòtoprens

se yon boul dyaman

okenn òfev pa ka taye

—

Pòtoprens 

se yon boul dife

ki twò cho pou pla men le monn

—

Pòtoprens

se yon boul san

ki kaye nan souf nou

—

Pòtoprens 

se yon boul malatchong

ki pa janm tonbe

—

Pòtoprens pa m lan

se yon pòy sigarèt

nan fatra bò lari

pèsonn pa vle ranmase

———————————————

Vag Poetik

Paroles des Îles

Jeanie BOGART — Sa m Pral Kite Dèyè, depuis le Canada

The post Pòtoprens — un poème de Jeanie BOGART appeared first on Mapou Littéraires.

Ou pa ka gade devan toutan

Ou pa ni bourik ni chwal ki gen kat je

Yon lè fòk ou gade sou kote

Gade agoch

Gade adwat

Gade dèyè

Gade anlè

Pou konn ki kote w gad

Pou konn kibò w kanpe sou latè

———————————————

Vag Poetik

Paroles des Îles

Jonel JUSTE, depuis les États-Unis, 2025

The post Agoch Adwat — un poème de Jonel JUSTE appeared first on Mapou Littéraires.

N ap viv nan abri

Nou pa alabri

Bal monte desann tèt

Bal pèdi nan chache kò

Lavi k ap kankannen anba gwo dife kawoutchou

———————————————

Vag Poetik

Paroles des Îles

Ricardo BOUCHER, depuis Port-au-Prince, Haïti

The post Bal pèdi — un poème de Ricardo BOUCHER appeared first on Mapou Littéraires.

Plas Sentàn douvanjou ap trennen yon wòb gri

Yon chen ki kanpe sou twa pye

Ap chèche rèv li nan yon ma san

———————————————

Vag Poetik

Paroles des Îles

Guy Gérald MÉNARD, depuis Delmas, Haïti,1996

The post Plas Sentàn — un poème de Guy Gérald MÉNARD appeared first on Mapou Littéraires.

———————————————

Vag Poetik

Paroles des Îles

Jean Grégory Floriyo (GREGPHILE), depuis Port-au-Prince, Haïti, 2025

The post Kèzili — un poème de GREGPHILE (Jean Grégory FLORIYO) appeared first on Mapou Littéraires.

cheve w

yon ponyen lapli

k ap farinen nan men m

je m tonbe nan je w

kè m fann

m ap bwè souf ou pou m kenbe lavi

—

pwent tete w

seriz sou gato

fanm kreyòl

lang ou se lang simbi

yon kou pou de

m fè priyè m nan bouch ou

lè danmbala mande m siwo

———————————————

Vag Poetik

Paroles des Îles

Florestal le Moine, depuis Cap-Haïtien, Haïti, Février 2023

The post lapli ak siwo — un poème de Florestal le Moine appeared first on Mapou Littéraires.

Lè tilezanj mouri mò swaf

Latè tounen ti yaya

Nan pwen syèl ki pare

Pou pare dlo je

—

Tòdè rèl

Plenn fouye kè kanmenm

Pyès kout pyès

Pa pyese tou nan vant.

———————————————

Vag Poetik

Paroles des Îles

Ruthza PAUL, depuis les Cayes, Haïti, Juin 2024

The post Rèl — un poème de Ruthza PAUL appeared first on Mapou Littéraires.

lè m te gen 5 an

metye m

se plante solèy nan tout ti kwen

bò lakay

—

lè m vin gen 15 an

mwen santi m cho

tout selil nan kò m ap feraye

—

kon m vin gen 18 an

mwen wè w ki parèt

tankou yon vè dlo

m ap vide nan rasin mwen

yon ti gout agoch

yon ti gout a dwat

yon lòt nan mitan

—

mwen kite kò m tousuit

pou ofinal m al chwe

sou de grenn bote

lapli kite anba kòsaj ou

———————————————

Vag Poetik

Paroles des Îles

Douglas ZAMOR, depuis les États-Unis, Octobre 2025

The post Piramid — un poème de Douglas ZAMOR appeared first on Mapou Littéraires.

Powèm yo se envokasyon 

entèpelasyon pou pwezi monte 

danse nan tèt nou.

—

Milokan trase pou rèv alagouy

vini danse djayi sou fèy blanch.

—

Pawoli yo se pousyè, sann layite

nan kat van.

—

Kwen kat fasad

kote lavi kase doble.

—

Epi noumenm pòv powèt

nou ye, mesaje nouvèl gaye

n ape pote.

—

Epi kè nou repozwa

vwa asòtò apre dans.

—

N ava wè yo

sa ki di byen 

sa ki di mal

zafè a yo.

—

Nan de nawè sou ti chèz ba

n ape founi je gade yo

k ape demele gèt yo.

———————————————

Vag Poetik

Paroles des Îles

Manno EJÈN, depuis le Canada, Août 2024

The post Noumenm pòv powèt nou ye — un poème de Manno EJÈN appeared first on Mapou Littéraires.

Siwo dòja m

sonje nan dènye gouyad la

m te pote nan zòrèy ou

—

andikape se maleng

k ap file  lang

bay mouch avè

devan palè nasyonal

plen midi

—

se moso larezon sou do mòn

ki manje bab lorizon

lè Miskaden touye dwa moun nan letan

—

se souflantchou asogwe

Avoka  mòn

nan vann pwèl bay simtyè

—

tout priyè konnen

Pèleren se pwa grate

k ap konte kadav nan syèl

depi w nan dòmi sou galeri

se klou gagit k ap jwe

tanbou

nan festen w

nan dènye kwen lanmè

—

lè bawon leve

pou manje zosman w

w ap konprann

anba chak bak machann diri Monseyè Giyou

gen yon

grenn sandal regleman

k ap pote souf nan kòsay

madan Kolo

—

m renmen pwèl

se pou sa legim mwen

se nan kilòt ou m sere l

———————————————

Vag Poetik

Paroles des Îles

Guillol VICIÈRE — Mèt Vèb, depuis Côtes-de-Fer, Haïti, Août 2025

The post Kamyonèt sou galeri — un poème de Guillol VICIÈRE (Mèt Vèb) appeared first on Mapou Littéraires.

Si demen ta bliye mwen ak ou

se pou non nou kouri nan venn sila

k ap gen pou vini aprè nou yo

—

Lasosyete bèk fè

se jwèt sèk l ap fè ak lonbray li

Se pa pou dan griyen

m renmen ou lajè lavi m

—

Lè nanm ou kontre ak memwa m

depi se figi

ki te pote m jouk isit la

marenge douvan m

—

Fason non w mezi djòl mwen sa a

depase langaj m leve ap pale

———————————————

Vag Poetik

Paroles des Îles

Ninia BIEN-AIMÉ, depuis les États-Unis, Octobre 2025

The post Kòmè — un poème de Ninia BIEN-AIMÉ (Ti Powèt) appeared first on Mapou Littéraires.