Yèswa m reve w k ape vini

ak tout boulin

yon latriye zetwal nan zye w

Lè mwen pare pou m voye chèche w

anvan lapli tanmen

Mwen pantan toutouni

kè mwen tanbou batan

Solèy te gentan leve

jou bare m k ape chante non w dous dous

—

Kòmè

ekri non mwen anba sapat ou

pou m pa pèdi ale vini w

Mwen pa ni fou ni anraje

Men

renmen w se sèl malè pandye

mwen bobo je fèmen

Yon ti priz pwazon vyolan ki bon pou vivans kè mwen

—

Pawòl lanmè san sèl

lè chit powèm nan pase lwen ou

Yo di mwen lanmè pa sere kras

dayè mwen tou

m pa bwat sekrè

Tout vèditè dwe konnen mwen renmen w

san bout nan lajè linivè