————————————————————————————————————

kote w ri

yon ribanbèl papiyon

sèvi m kouwòn 

vil yo anpenpan

tankou solèy lapli makiye

—

zetwal fè lago kache

nan de ranje dan w 

tout lò latè

bliye wout kay òfèv

—

Kè m tounen lanp tètgridap

k ap piyanp piyanp 

nan kalfou zo pwason 

—

zafè sila k pa konnen

si w se premye mèvèy dimonn  

—

mwen m pa bouke make pa

nan kanaval souri w 

lè fanm ki jalou w

fè bri pase cha 

—

tout motè debreyèl mache dwat

tout rivyè se sous

pou flè w pouse 

—

Tonnèboule m an sann

se souri w ki te leve Laza 

———————————————

Smeev Jerry, depuis Gonaïves, Haïti, Août 2025