---

M pa fè powèm pou doulè dous

M ap korije kaye sivilizasyon san

Isit la menm nan Tabènak Ife 

Isit la menm sou tè sa a

M bay lanmò ason

Isit la menm sou tè sa a 

Malè yo voye sou mwen 

M ba yo maleng malen pou yo pa janm fè sa 

Isit la menm sou tè sa a

Yo mache anba tè pou yo jwenn pwen mwen

–

O powèm bò manman 

O powèm bò papa

Men powèm mwen pou mwen

Yo pa vle m danse andan l

Men pwoblèm mwen pou mwen

Yo pa vle m griyen dan m ladan l

Men lanfè m pou mwen

Yo pa vle m di l lanmèd

Men bondje m pou mwen

Yo pa vle m mouri ladan l

Men peyi mwen pou mwen wi

Yo refize m lavi ladan l

Lè limanite pran dlo

Se mwen ankò wi

Ki pot mo kolboso yo sou do m 

–

Isit la menm sou tè sa a

M lwe letènite kay 

M jwe kat sou tab ak laj mwen

Kite lavi a rann gaz

O powèm bò manman

O powèm bò papa

Se pa jodi a y ap debagaje rèv

Pou jwenn pwen mwen

M kite gad mwen ap gade yo

San fè regadan

San fè lach

–

Si w pa konn non m

Rele m sele pa moute moute pa sele

Si w pa konnen mwen

Rele m sele pa moute moute pa sele

Di yo nou pa modèl moun mouch ka achte

Nan lavant vyann move sant

–

Lè powèm mwen ap benyen mwen

Lè powèm mwen ap pran swen mwen

Ale di yo

Vanjans pa n mete van aleprèv

Vanjans pa n dechire vil dechire tan

Dechire rèl dechire lang

Dechire vid pou lavi koule luil

–

Sonje nou sonde son kat kalfou 

Kat kalfou sonde son nou

O silans bò manman 

O silans bò papa

Isit la menm sou tè sa a

Nou bay defi dife refi

Pou n kanzo dlo

Pou limanite ak libète mache kòtakòt

Nan boul figi sivilizasyon san

–

O dife bò manman 

O dife bò papa

Isit la menm sou tè sa a

Isit la menm nan tabènak Ife

Nan mitan kafou kat eleman

Mwen entèpele tout eskòt powèm mwen yo

Kite manchèt mwen an kòlè

Anvan demen limen

P ap gen kav 

Pou kadav rèv ki pa t vle wè n

---

Anivince Jean-Baptiste (Tivens), depuis Port-au-Prince, Haïti, Août 2025