---

Pou Baptisma Pharlie 

Avan tout lank fini

m vin di w 

kite priyè a fè chemen l 

pou okenn barikad 

pa anpeche kò nou fwote 

sou moso mizik la 

–

M pa nan fè gwo kòlèt

kòmkwa mwen se powèt 

ki gen plis enspirasyon 

m vin di tout moun 

se ou ki pote 

tout vèb mwen yo

–

Premye fwa m ekri 

san pwen 

san vigil

anba je lisifè 

moso

powèm sa a

se kras tabak 

nan pip grann mwen

–

Chak souri 

chak gouyad 

chak kout ri 

se pwomès paradi 

tankou lè zanj ap pran lang 

 –

Si ou wè m te pran tan 

pou dedikas sa a  

lè w powèt w ap konprann 

pyès gwo ekriven 

pa ka kole mo pou dekri Bondye 

–

Ou se Bondye m 

m pa gen pou m priye 

peche m yo padone 

nan bitasyon kè w 

mèsi 

paske w pote sant retay kilòt 

ou nan kalson m 

–

Avan w fin mouye lang ou

nan powèm sa a 

mete kilòt nwa a 

fè yon milyon ven foto 

paske toutouni w 

se solèy ki limen 

chak fraz mwen ekri 

–

Se pi bon refren 

pi bon solo 

pi bon akò 

se yon dlo dous 

nan Lalin ak Solèy 

–

Powèm nan

se yon melodi gouyad

k ap fredone sou pigatwa m

–

Mwen renmen w se pi gwo pwen 

fraz mwen yo chante

---

Guillol VICIÈRE (Mèt Vèb), depuis Port-au-Prince, Haïti, Novembre 2025