————————————————————————————————————

m anvi dòmi leve nan gildiv ou 

m anvi ou ban m tout koulè ou vle

m anvi sèl renn nan rara ou

—

di mwen si w se Senjak oubyen Senchal

pou m ka chante litani ou

jouk solèy la pèdi chalè l

m anvi ou benyen nan florida m

—

anvan lalin leve gad li

m vle w

m vle w jouk souf mwen sispann 

—

wi

pann mwen

Pann tout tchè fanm mwen

—

pran m jouk lanati fè kòlè 

pran m fè lespri yo fè jalouzi

pran m

jouk mèt latè makònen nou ansanm

—

m anvi

m anvi w

m anvi tout sa k gen anpwent ou

———————————————

Edlande Jostha ELIE, depuis L’Éstère, Haïti, 2023